काठमाडौं : इण्डियन प्रिमियर लिग क्रिकेट (आईपीएल)मा सनराईजर्स हैदरावादले दोस्रो जित निकालेको छ।
दुबईमा सोमबार राति भएको खेलमा अंक तालिकाको पुछारमा रहेको हैदरावादले राजस्थान रोयल्सलाई ७ विकेटले हराउँदै दोस्रो जित निकालेको हो।
राजस्थानले दिएको १ सय ६५ रनको लक्ष्य हैदरावादले १८ ओभर ३ बलमा ३ विकेट गुमाएर पूरा गर्यो ।
हैदरावादको जितमा डेब्यु खेलाडी जोसन रोयले सर्वाधिक ६० तथा कप्तान केन विलियम्सनले अविजित ५१ रनको अर्धशतकीय इनिङ्स खेले ।
राजस्थानका मुस्ताफिजुर रहमान, चेतन शाकरिया र महिपाल लोम्रोरले एक एक विकेट लिए ।
यसअघि पहिले ब्याटिङ गरेको राजस्थानले २० ओभरमा ५ विकेट गुमाएर १ सय ६४ रन बनाएको थियो। राजस्थानका लागि कप्तान सन्जु सामसनले ८२ रनको अर्धशतकीय इनिङ्स खेले ।
हैदरावादका सिद्दार्थ कउलले दुई विकेट लिए।
जितसँगै १० खेलबाट ४ अंक जोडेको हैदरावाद अंकतालिकाको पुछारमा रहेको छ । १० खेलमा ८ अंक जोडेको राजस्थान छैटौं स्थानमा रहेको छ ।