बडादशैंको अवसर पारेर यही असोज १३ गतेदेखि १५ गतेसम्म मधेश प्रदेशको मुटु मानिने ईश्वरपुर नगरपालिकाको वडा नम्बर १२ कालिन्जोर, सर्लाहीमा ‘प्रथम मधेश प्रदेश खुल्ला भलिवल प्रतियोगिता २०७९’ आयोजना हुने भएको छ । तीन दिनसम्म चल्ने प्रतियोगितामा मधेश प्रदेशभरीबाट खेलाडी टिमले सहभागिता जनाउन पाउनेछन् ।भलिवल प्रतियोगितामा विजेता हुने टिमलाई नगदसहित विभिन्न पुरस्कारहरु प्रदान गरिने आयोजक कमिटी कालिन्जोर यूवा समुहले जानकारी गराएको छ । प्रतियोगितामा राष्ट्रिय स्तरका खेलाडीहरुको पनि सहभागिता रहने बताइएको छ । प्रतियोगिताको दौरानमा विभिन्न सांस्कृति कार्यक्रम, भेषभुषा प्रदर्शनीका साथै फूड फेस्टिभल पनि हुनेछ ।
भलिवल प्रतियोगिता आयोजना गर्नुको उद्देश्य देश तथा विदेशमा कालिन्जोरमा रहेको पर्यटकीय गन्तव्यको प्रचार गर्नु रहेको स्थानीय शिक्षक भीम खड्काले जानकारी दिए । कालिन्जोर १२ मा मधेश प्रदेशकै सबैभन्दा अग्लो चुचुरो रहेको छ, जसलाई राजारानी डाँडा भन्ने गरिन्छ । भलिवल प्रतियोगितासहितको सांस्कृति कार्यक्रम कालिन्जोरको वडा कार्यालयको खेल मैदानमा हुनेछ ।