Admission Open

‘महिलामैत्री कानुन निर्माणमा प्रदेश सरकार प्रतिबद्ध छ’ : विन्दुकुमार थापा

पोखरा : गण्डकी प्रदेश सरकारका कानुन, सञ्चार तथा प्रदेशसभा मामिलामन्त्री विन्दुकुमार थापाले महिलामैत्री कानुन निर्माणमा प्रदेश सरकार प्रतिबद्ध रहेको बताएको छन् । मङ्गलबार ११२औँ अन्तर्राष्ट्रिय महिला दिवसका अवसरमा पोखराको रेडियो जननी ९०.६ मेगाहर्जले आफ्नो आठौँ वार्षिकोत्सवको अवसरमा आयोजना गरेको ‘व्यवसायमा महिला, अवसर र चुनौती’ विषयक अन्तक्र्रिया कार्यक्रमलाई उनले सो कुरा बताएको हुन् ।

मन्त्री थापाले समाजमा महिलालाई हेर्ने दृष्टिकोणमा विस्तारै परिवर्तन हुँदै आएको र व्यावसायिक, राजनीतिक, शैक्षिक तथा सामाजिक क्षेत्रमा महिलाको सहभागिता उल्लेखनीय बन्दै गएको बताए । उनले व्यावसायिक क्षेत्रमा महिलाको आर्कषण बढाउन प्रदेश सरकारले सहज नीति निर्माण गर्दै आइरहेको बताए ।

मन्त्री थापाले प्रदेश सरकारले कोभिड प्रभावित व्यावसायिक क्षेत्रलाई ब्याज सरकारले नै तिर्ने गरी कर्जा उपलब्ध गराउन लागेको जानकारी गराए । यसका लागि चालु आर्थिक वर्षको जीवनरक्षा कोषमा रु एक अर्ब राखिएको उनको भनाइ छ । सामाजिक, राजनीतिक, प्रशासनिक, सांस्कृतिक क्षेत्रमा महिला पुरुषमा देखिएको विभेदको अन्त्य गर्न सम्बद्ध सङ्घसंस्थाले महिला जागरणसम्बन्धी तालिम समय–समयमा गरिराख्नुपर्ने उनले बताए । उनले गण्डकी प्रदेश सरकारले स्तन र पाठेघर क्यान्सरको निःशुल्क उपचार गर्ने निर्णय गरेको रक्यान्सरपीडितका लागि नेपाल सरकारले एक लाख रूपैयाँ र गण्डकी प्रदेश सरकारले ५० हजार रूपैयाँ उपलब्ध गराउँदै आएको जानकारी दिए ।

कार्यक्रममा नेपाल उद्योग बाणिज्य सङ्घका पूर्वअध्यक्ष आनन्दराज मुल्मीले नेपालको जनगणनाअनुसार ३७ प्रतिशत महिलाले मात्र रोजगारी पाएको बताए । महिला आफँै जाग्नुपर्ने आवश्यकतालाई उनले औँल्याए । सङ्घ महिला उद्यम विकास समिति संयोजक मुना बाँस्तोला व्यवसायमा महिलालाई अझै पनि थुप्रै चुनौती रहेको महिलामैत्री वातावरण अभावमा महिला नेतृत्वमा पुग्न र व्यावसायिक छवि बनाउन अझै समस्या देखिएको बताए ।

पर्यटन व्यवसायी लक्की कार्की क्षेत्रीले महिलालाई सुरक्षित वातावरण बनाउनुपर्ने बताए । महिलाका अधिकार र मुद्दालाई सम्बोधन गर्नुपर्ने आवश्यकता रहेको उनले उल्लेख गरे । कार्यक्रममा रेडियोकी संस्थापक अध्यक्ष हीरा भट्टराईलाई जननी सम्मानद्वारा सम्मान गरिएको थियो ।

सम्बन्धित खवर
टिप्पणिहरु
Loading...