पोखरा, २८ जेठ / मुख्यमन्त्रीको दावी प्रस्तुत गर्न गण्डकी प्रदेशका विपक्षी गठबन्धनका सांसदहरु प्रदेश प्रमुखको कार्यालय पुगेका छन् । गण्डकी प्रदेशका मुख्यमन्त्री पृथ्वीसुब्बा गुरुंगले विश्वासको मत प्राप्त गर्न नसकेपछि हिजो पदमुक्त भएका थिए ।
पदमुक्त भएको पत्र आज प्रदेश प्रमुखको कार्यालयमा पुगे लगत्तै प्रदेश प्रमुखले २४ घण्टाको समयसिमा तोकेर नयाँ सरकार गठनका लागि आह्वान गरेकी थिइन् । आह्वान गरेको दुई घण्टामै गण्डकी प्रदेशमा मुख्यमन्त्रीमा दावी पेश गर्न नेपाली कांग्रेसका सांसद कृष्णचन्द्र नेपाली प्रदेश प्रमुखको कार्यालय पुगेका छन् ।
नेपाली कांग्रेस संसदीय दलका नेता कृष्णचन्द्र नेपालीले आफ्नो दल कांग्रेससँगै नेकपा माओवादी केन्द्र, राष्ट्रिय जनमोर्चा, जनता समाजवादी पार्टी र स्वतन्त्र सांसद दीपक मनाङेको समर्थनमा मुख्यमन्त्रीको लागि दावी पेश गर्न प्रदेशप्रमुख समक्ष गएका हुन् । उनीहरु अहिले प्रदेश प्रमुखको कार्यालयमा रहेका छन् ।
बिहीबार मुख्यमन्त्री पृथ्वीसुब्बा गुरुङले प्रदेशसभामा विश्वासको मत लिन नसकेपछि उनी पदमुक्त भएका थिए । प्रदेश प्रमुख सीता पौडेलले शुक्रबार संविधानको धारा १६८ (५) अनुसार सरकार गठनका लागि आह्वान गरेकी थिइन् ।