आर्थिक क्षेत्रमा महिलाको सहभागिता बढ्दो

महिलाहरूको आर्थिक क्षेत्रमा सहभागिता बढ्नु सकारात्मक विषय भएको अधिकारकर्मी यमुना घलेले बताइन् । कृषि तथा खाद्य सुरक्षा विज्ञसमेत रहनुभएकी र कृषिलाई आर्थिक सशक्तिकरणको प्रमुख हिस्सा बनाउनुपर्छ भन्ने अभियानमा लागेकी उनले महिलाको आर्थिक सशक्तिकरणमा समेत जोड दिँदै आएकी छिन् । “पछिल्लो समय उद्योग, व्यवसायमा महिलाको सङ्ख्या वृद्धि हुनुमा सरकारले महिलालाई प्राथमिकतामा राख्नु, महिलाका लागि बनेका नीतिहरू, पुरुषको आप्रवासन र महिलाहरू पनि पछिल्लो समय शिक्षित हुँदै जानु हो,” अधिकारकर्मी घलेले भनिन्, “यी कारणले महिलाहरू उद्योग व्यवसायमा बढी लागेको देखिएको छ । यसले सकारात्मक प्रभाव पारेको देखिन्छ । आर्थिक क्षेत्रमा पछिल्लो समय सङ्गठनात्मक रुपमा उपस्थित बढ्दो छ । महिला उद्यमीहरूको आफ्नै सङ्गठन समेत छन् । तसर्थ यो कुरालाई सकारात्मक रुपमा लिनुपर्छ तर निर्णायक तहमा महिलाको पहुँच भने सोचेजस्तो छैन ।”

स्थानीय नेत्री पुष्पा भुषालका अनुसार निर्णायक तहमा महिलाको पहुँच नहुनुमा काम गर्ने वातावरण महिलामैत्री नहुनु, सरकारले महिलाका लागि नीतिनियम ल्याए पनि सम्बन्धित निकायबाट कार्यान्वयनमा ल्याउन नखोज्नु, संस्था दर्तादेखि बैंकिङ प्रक्रियामा अझै पनि पुरुष नै खोज्ने, महिला मात्रै जाँदा पुरुष खोई भनी सोध्ने, पुरुष नभएमा प्रक्रिया अघि बढाउन नखोज्नेलगायत प्रवृत्तिले पनि महिलाहरू पछि परेका थिए । सामाजिक संरचनाले पनि महिलाहरू पछि पर्न बाध्य भएको उनको बुझाइ थियो । “अझै पनि हाम्रो समाजमा छोरीचेलीलाई घरभित्रको कामकाज गर्नैपर्ने बाध्यता छ, घरभित्रको काम अन्य सदस्यहरुले सघाउने, महिलालाई हौसला दिने परिपाटी छैन । त्यसैले पनि महिलाहरू चाहेर पनि अघि बढ्न वा निर्णायक तहमा पुग्न सकिरहेका छैनन्,” भुषालले भनिन् । (रासस)