रसुवा : रसुवामा विभिन्न दलका बागी उम्मेदवारी दिएकाहरू यतिबेला चुनावी प्रचारप्रसारमा लागेका छन् । पार्टीले टिकट नदिएको भन्दै असन्तुष्टि जनाई गाउँपालिका अध्यक्ष र उपाध्यक्षमा बागी उम्मेदवारी दिएकाहरू यतिबेला भाेट माग्न सक्रिय भएर लागेका छन् ।
नेपाली कांग्रेसका विजय तामाङले पार्टीप्रति असन्तुष्टि जनाउँदै उत्तरगया गाउँपालिका अध्यक्षमा उम्मेदवारी दर्ता गराए । उत्तरगया गाउँपालिकाकै उपाध्यक्षमा कांग्रेसकी सिर्जना तामाङले पनि उम्मेदवारी दर्ता गराइन् ।
३० वैशाखमा हुने स्थानिय तहको निर्वाचनमा बागी उम्मेदवारी दिएकाहरूलाई नेपाली कांग्रेस रसुवाले उम्मेदवारी फिर्ता लिन निर्देशनसमेत दिएको थियो । पार्टीप्रति असन्तुष्ट रही स्वतन्त्र रूपमा गाउँपालिका अध्यक्ष र उपाध्यक्षमा उम्मेदवारी दिएकाहरू केहीले पार्टीको निर्देशन पालना गर्ने भन्दै उम्मेदवारी फिर्ता लिए । तर उत्तरगया गाउँपालिकामा भने अध्यक्ष र उपाध्यक्षमा बागी उम्मेदवारी दिएका नेपाली कांग्रेसका तामाङद्वयले आफ्नो उम्मेदवारी कायमै राखेका छन् । उनीहरू यतिबेला घरदैलो अभियानमार्फत प्रचारप्रसारमा लागेका छन् ।
नेपाली कांग्रेस रसुवाले बागी उम्मेदवारी दिएकालाई उम्मेदवारी फिर्ता नलिए विधानअनुसार स्वत: साधारण सदस्यसमेत नरहने गरी कारबाही हुने निर्देशन दिए पनि बागी उम्मेदवारलाई कुनै कारबाही गरेको छैन ।
कांग्रेस रसुवाले नौकुण्ड गाउँपालिकामा जनता समाजवादी पार्टीसँग गठबन्धन गरेको छ । गाउँपालिका अध्यक्षमा काग्रेस र उपाध्यक्षमा जनता समाजवादीबाट उम्मेदवार छन् भने जिल्लाको अन्य चारवटा गाउँपालिकामा एक्लाएक्लै चुनावी मैदानमा उत्रिएका छन् ।